नेवासे / नगर सहयाद्री : अहमदनगर मधून अनेक धक्कादायक घडामोडी सातत्याने समोर येत आहेत. अनेक गुन्हेगारी घटना देखील सातत्याने घडत आहेत.
आता आणखी एक धक्कादायक बातमी समोर आली आहे. दारूसाठी पैसे न दिल्याने एकास गावठी कट्टा लावून जिवे मारण्याची धमकी दिलीये. ही घटना नेवासा तालुक्यातील घोडेगाव येथील घोडेगाव सोनई चौकात भर दुपारी घडली. निलेश मधुकर केदारी असे आरोपीचे नाव आहे.
मंगळवार (14 नोव्हेंबर) रोजी फिर्यादी रामदास जाधव घरी निघाले असताना आरोपी निलेश हा मोटारसायकलवर घरासमोर आला व फिर्यादीस दारु पिण्यासाठी पैशाची मागणी केली. फिर्यादी यांनी पैसे देण्यास नकार दिला असता आरोपी केदारी याने फिर्यादीस शिवीगाळ केली.
त्यानंतर फिर्यादी यांच्या दुचाकीला आरोपीने त्याच्या दुचाकीने धडक दिली. तेव्हा दोघेही खाली पडल्याने किरकोळ दुखापत झाली. त्यातंर आरोपीने फिर्यादीस मारहाण केली.
त्यांच्या खिशातील 5200 रुपये चोरून नेले. तसेच आरोपीने गावठी कट्टा काढून फिर्यादीस जिवे मारण्याची धमकी दिली. या प्रकरणी सोनई पोलीस ठाण्यात गुन्हा दाखल करण्यात आला असून पुढील तपास पोलीस करत आहेत.
