अहमदनगर | नगर सह्याद्री
अंगणवाडी सेविका महागाईच्या काळात १० हजारांत काम करत आहेत. त्या लहान बालकांना घडवतात. ज्ञानदानाच्या कामासोबतच शासनाच्या विविध उपक्रम राबवण्याची जबाबदारीही त्या पार पाडत असतात. त्यांचे विविध प्रश्न मार्गी लावण्यासाठी राज्य सरकारकडे पाठपुरावा करू, त्यांना त्यांच्या कामाचा मोबदला मिळवून देण्यासाठी प्रयत्न करू अशी ग्वाही माजी मंत्री शिवाजीराव कर्डीले यांनी दिली.
अंगणवाडी, बालवाडी सेविका, मदतनीस, कर्मचारी राज्यव्यापी बेमुदत संपावर असून त्यांनी माजी मंत्री शिवाजीराव कर्डीले यांची भेट घेतली. त्यांना आपल्या मागणीचे निवेदन देत १० डिसेंबर रोजी नागपूर अधिवेशनात धडकणार असल्याचा इशारा दिला. यावेळी भाजपचे युवा अक्षय कर्डीले, बाजार समिती सभापती भाऊसाहेब बोठे, उपसभापती रभाजी सूळ, सुमन सप्रे, स्मिता औटी यांच्यासह जिल्हाभरातील अंगणवाडी, बालवाडी सेविका, मदतनीस, कर्मचारी उपस्थित होते,
निवेदनात म्हटले आहे की, विविध मागन्या मान्य न झाल्यामुळे महाराष्ट्र राज्य अंगणवाडी, बालवाडी कर्मचारी, युनियन आयटक व कृती समितीद्वारे ४ डिसेंबर २०२३ पासून अहमदनगर जिल्ह्यातील अंगणवाडी सेविका व मदतीस कर्मचारी बेमुदत संपावर गेले आहेत. अध्यक्ष सुमन सप्रे यांनी माहिती दिली की जिल्ह्यातील अंगणवाडी सेविका, मदतनीस, कर्मचारी हे नोव्हेंबर २०२३ चा महिन्याचा मासिक अहवाल ( एम पी आर), मासिक बैठका, इतर माहिती व कामे करणार नसून सर्व कामकाजावर बहिष्कार टाकला आहे. संघटनेच्या माहितीनुसार अहमदनगर जिल्ह्यातील ४ हजारांच्यावर तर महाराष्ट्रातील १ लाख अंगणवाडी कर्मचारी संपात सहभागी होतील.
काय आहेत मागण्या ?
– सर्वोच्च न्यायालयाने ग्रॅज्युईटीबाबत दिलेल्या अंतिम निकालाची अंमलबजाणी करणे
– अंगणवाडी सेविका व मिनी सेविकांना दरमहा २६ हजार तर मदतनिसांना २० हजार रुपये मानधन
– महागाई निर्देशांकाला जोडून दर ६ महिन्यांनी मानधनात वाढ करणे
– विना योगदान मासिक निर्वाह भता (पेन्शन) सेवा समाप्तीनंतर देण्याचा प्रस्ताव हिवाळी अधिवेशनात मंजूर करणे
– आहाराचा दर सर्वसाधारण १६ व अतिकुपोषित बालकांसाठी २४ रुपये करणे
