नगर सह्याद्री / हैद्राबाद : सिनेसृष्टीतून एक मोठी बातमी आली आहे. महिलेस आत्महत्या करण्यास प्रवृत्त केल्याच्या आरोपावरून ‘पुष्पा : द राईज’ फेम अभिनेत्यास अटक केली आहे. त्यामुळे एकच खळबळ उडाली आहे. अल्लू अर्जुनच्या ब्लॉकबस्टर ‘पुष्पा : द राईज’ सिनेमात महत्त्वपूर्ण भूमिका साकारणाऱ्या जगदीश प्रताप बंडारी याना अटक केली आहे.
त्यांनी या सिनेमात पुष्पाचा मित्र केशवची भूमिका साकारली होती. एका ज्युनिअर आर्टिस्टसोबत 30 वर्षीय जगदीश लिव्ह-इन रिलेशनशिपमध्ये होता. संबंधित महिलेनं 29 नोव्हेंबर रोजी आत्महत्या केली होती. महिलेच्या आत्महत्येनंतर तिच्या कुटुंबीयांनी जगदीशवर आरोप केला आहे. तक्रार दाखल केल्यानंतर आणि पुढील तपास केल्यानंतर बुधवारी पोलिसांनी अभिनेत्यावर अटकेची कारवाई केली.
काय आहे प्रकरण?
29 नोव्हेंबर रोजी सदर महिलेने आत्महत्या करत आपलं आयुष्य संपवलं. ती महिला 27 नोव्हेंबर रोजी दुसऱ्या व्यक्तीसोबत होती. त्याचा व्हिडीओ जगदीशने शूट केला होता आणि त्यावरून तो तिला ब्लॅकमेल करत होता, असं पोलिसांच्या तपासादरम्यान समोर आलं.
व्हिडीओद्वारे ब्लॅकमेल करून प्रायव्हेट फोटो सोशल मीडियावर पोस्ट करण्याची धमकी त्याने दिली होती. त्यानंतर महिलेनं टोकाचं पाऊल उचलत आत्महत्या केली. त्यानंतर त्याला अटक केली. जगदीशने ‘सत्थी गनी रेंदु येकारलु’ या छोट्या बजेटच्या ड्रामामध्ये काही दिवसांपूर्वी काम केलं होतं. याशिवाय तो नितीन आणि श्रीलीला यांच्या ‘एक्स्ट्रा ऑर्डिनरी मॅन’ आणि ‘अंबाजीपेटा मॅरेज बँड’ या चित्रपटांमध्येही झळकणार असल्याची माहिती मिळाली आहे.
