मुंबई। नगर सहयाद्री –
मुंबईच्या डोंबिवली एक धक्कादायक घटना घडल्याची बातमी समोर आली आहे. अल्पवयीन विद्यार्थिनींवर शिक्षकाने अत्याचार केल्याची घटना घडली आहे. याप्रकरणी पोलिसांनी खाजगी शिक्षक अजितकुमार साहू याला अटक केली आहे.
मिळालेल्या माहितीनुसार, शिक्षक अजितकुमार साहू ‘जनरल नॉलेज’ या विषयाचे कोचिंग क्लासेस घेतात. तक्रारदार महिलेची आठ वर्षाची मुलगी त्यांच्याकडे होती. आठ वर्षीय मुलगी क्लासवरून घरी आल्यानंतरची मानसिक स्थिती बघून नातेवाइकांनी तिची विचारपूस केली. तिने जे सांगितले ते ऐकून सर्वांना धक्काच बसला.
तिच्यावर लैंगिक अत्याचार केला जात होता. लैंगिक अत्याचार करणारा दुसरा तिसरा कोणी नव्हता तर, ती ज्या ठिकाणी क्लासला जाते. त्याच क्लासचा शिक्षक असल्याचे समोर आले. कटूंबाला हकीगत माहिती होताच त्यांनी थेट पोलिसात तक्रार दाखल केली.
‘गुड टच बॅड टच’ कार्यक्रम गरजेचा
सध्या अनेक शाळांमध्ये शाळकरी मुलींसाठी वेगवेगळ्या पद्धतीच्या समुपदेशनाचा वर्ग घेतले जातात. त्यात अनेक संस्थांनी पुढाकार घेतला आहे. सायकोलॉजिस्ट किंवा इतर डॉक्टर प्रत्येक शाळेत जाऊन विद्यार्थ्यांशी संवाद साधताना दिसतात. या संवादातून विद्यार्थिनींना अनेक प्रकारचं मार्गदर्शन केलं जातं. लैंगिकतेबाबत माहिती दिली जाते. त्यासोबतच गुड टच बॅड टच याची देखील उत्तम प्रकारे माहिती दिली जाते.
