जालना । नगर सहयाद्री-
जालन्यात गुन्हेगारी वाढली आहे. या गुन्हेगारांवर कारवाई करण्यासाठी पोलिसांकडून उपाययोजना केल्या जात आहेत. अनेक गुन्हेगारांवर कारवाई झाली. तरी देखील माजी आमदार समर्थकाची भरदिवसा गोळ्या झाडून हत्या केल्याचा प्रकार समोर आला आहे.
काल भरदिवसा जालन्यातील मंठा चौफुलीवर कारला आडवे येत ३ आरोपींनी एका तरुणाची गोळ्या झाडून हत्या केली. गजानन मच्छिंद्रनाथ तौर असे मृताचे नाव आहे. माजी आमदार अर्जुन खोतकर यांचा तो समर्थक मानला जात होता.
गजानन तौर आपले काम आटोपून कारने जालन्याकडे येत असताना मंठा चौफुली येथे त्याची गाडी ५ जणांनी अडवली. तौर खाली उतरून त्या तरुणांशी चर्चा करत होता. याच वेळी पाचपैकी तीन आरोपींनी पिस्तुलातून त्याच्यावर गोळ्या झाडल्या.
दरम्यान, रक्तबंबाळ तौर यास तातडीने खासगी रुग्णालयात हलवण्यात आले. मात्र डॉक्टरांनी तपासून मृत घोषित केले. याप्रकरणी पोलिसांनी तिघांपैकी लक्ष्मण गोरे याला अटक केली असून आणखी दोन अनोळखींचा आरोपींमध्ये समावेश आहे.
