अहमदनगर | नगर सह्याद्री:-काँग्रेसच्या बड्या नेत्यांची नावे घेत शहर काँग्रेस जिल्हाध्यक्ष किरण काळे यांची बदनामी करणे प्रवीण शरद गीते यास चांगलेच महागात पडले आहे. काळे यांच्या फिर्यादीवरून गुन्हा दाखल करण्यात आला आहे. विधानसभा निवडणूक डोळ्यासमोर ठेवत किरण काळे यांचा कोणताही संबंध नसताना गीते याने माजी मंत्री बाळासाहेब थोरात यांच्या सह वरिष्ठ नेत्यांची नावे येत काळे यांचे नाव जोडण्याचा बनाव रचला आहे. शहरातील दहशत, गुंडगिरी विरुद्ध सातत्याने आवाज उठवणार्‍या काळे यांनाच गुंड म्हणून खोटी माहिती प्रसारित करीत बदनाम करण्याचे कटकारस्थान विरोधकांनी रचले असल्याचा आरोप काँग्रेसच्या वतीने गुंदेचा यांनी केला आहे. गीते बनाव प्रकरणाचा पोलिसांनी मास्टरमाईंड शोधून काढण्याची काँग्रेसने मागणी केली आहे.
दिनांक १९ जून २०१४ रोजी एमआयडीसी मध्ये असताना समाज माध्यमांवर प्रवीण शरद गीते या इसमाचा समाज माध्यमांवर व्हायरल झालेला व्हिडिओ पाहिला. गीते याने बीनबुडाचे वक्तव्य करून माझी समाजात नाहक बदनामी केली आहे. यावरुन काळे यांनी पोलिसांत गीतेवर गुन्हा दखल करण्यात आला आहे.दरम्यान, मनोज गुंदेचा यांनी म्हटले आहे की, गीते याने सिव्हील हॉस्पिटलला माध्यमांशी बोलतांना एक व एमआयडीसी पोलिस ठाण्यात तक्रार देताना दुसरी हकीगत सांगितली आहे. यातून हा बनाव असल्याचे निष्पन्न झाले आहे.
यापूर्वी तथाकथित आयटी पार्कचा इन कॅमेरा भांडाफोड केल्यानंतर किरण काळे यांच्यावर विनयभंगाचा गुन्हा दाखल करण्यात आला होता. पोलिसांनी सदर खोटी फिर्याद देणार्‍या महिलेविरुद्ध मे. न्यायालयात अहवाल सादर केला आहे. तथाकथित चावला हाफ मर्डर केस मध्ये देखील काळे यांना विरोधकांनी गोवले होते. मात्र त्याही प्रकरणात बनाव असल्याचे समोर आले आहे. पोलिसांनी खोट्या फिर्यादी दाखल होणार नाही त्यासाठी आधीच खबरदारी घेणे आवश्यक असल्याचे काँग्रेसने म्हटले आहे.
