राहाता । नगर सहयाद्री:-
तालुक्यातील कोर्‍हाळे गावामध्ये दि. 24 जून रोजी पोटच्या पोराने वडिलांची हत्या केल्याचा धक्कादायक प्रकार घडला होता. शेतजमीन नावावर करून देण्याच्या कारणावरून वडिल गणपत संभाजी कोळगे यांची हत्या केल्यानंतर आरोपी मुलगा अनिल कोळगे फरार झाला होता. फरार आरोपी अनिल गणपत कोळगे याला शुक्रवार दि 28 जून रोजी पोलिसांनी जेरबंद केले.
अधिक माहिती अशी: सदर गुन्ह्यातील फरार आरोपी अनिल गणपत कोळगे हा गुन्हा केल्यापासून फरार होता. शुक्रवार 28 जून रोजी सकाळी 10 वाजे दरम्यान आरोपी हा अस्तगाव फाटा येथे येणार असल्याची माहिती गुप्तचर विभागाचे पोलीस विनोद गंभीरे यांना मिळाल्याने त्यांनी सदरची माहिती पोलीस निरीक्षक सोपान काकड यांना दिली.
पोलीस निरीक्षक काकड तात्काळ गुप्तचर विभागाचे पोलीस गंभीरे व शिंदे यांना सदर ठिकाणी पाठवले. पोलिसांनी त्या ठिकाणी जाऊन आरोपी पकडण्यासाठी सापळा लावला. एक व्यक्ती पायी चालत आल्याचे पोलिसांना दिसले.
पोलिसांनी त्यास हटकताच तो पळू लागल्याने पोलीस पथकाने त्याला तात्काळ ताब्यात घेतले व पोलीस ठाण्यात आणले. पोलीस ठाण्यात आणून त्याच्याकडे गुन्ह्याच्या अनुशंगाने तपास केला असता त्याने गुन्हा केल्याचे कबूल केले.
