अहमदनगर। नगर सहयाद्री:-
जिल्ह्यामधील राहता तालुक्यामध्ये भीषण अपघाताची घटना घडली आहे. भरधाव वेगाने जाणाऱ्या दुधाच्या टँकरने दुचाकीला धडक दिल्याने साकुरी येथील ग्रामपंचायत सदस्य तरुणाचा जागीच मृत्यू झाला आहे.विश्वनाथ प्रकाश बनसोडे असे मयत तरुणांचे नाव आहे. सदरची मंगळवार दि. ३० रोजी पोलीस स्टेशनजवळ भडांगे टी सेंटर समोर घडली.
याप्रकरणी दुध टँकर चालकाविरोधात राहाता पोलिसात गुन्हा दाखल झाला आहे. याबाबत पोलीस सूत्रांनी सांगितले, की या अपघातप्रकरणी मृताचे नातेवाईक सचिन योसेफ बनसोडे (रा. साकुरी) यांनी राहाता पोलिसांत फिर्याद दाखल केली आहे.
फिर्यादीमध्ये म्हटले, की मंगळवार दि. ३० जुलै रोजी सकाळी साडेअकरा वाजेच्या सुमारास शहरातील पोलीस स्टेशनजवळ असलेल्या भडांगे टी सेंटरसमोर भरधाव वेगाने जाणाऱ्या एमएच १७ के ९०४५ या दुधाच्या टँकरने मोटारसायकलवर चाललेले भाऊ विश्वनाथ प्रकाश बनसोडे यांच्या मोटारसायकलला (क्रमांक एमएच १७ बीए ६८११) मागून जोराची धडक दिली.
यामध्ये मोटारसायकलसह विश्वनाथ खाली पडले. यामध्ये त्यांना जबर मार लागल्याने ते जागेवरच मृत पावले. मोटारसायकल मागच्या चाकाखाली सापडून अपघाताचा मोठा आवाज झाल्याने घटनास्थळी मोठी गर्दी जमली.
विश्वनाथ बनसोडे रक्ताच्या थारोळ्यात पडले होते, तर गाडीच्या काही भागाचा चुराडा झाला होता.नागरिकांनी बनसोडे यांना रुग्णवाहिकेतून ग्रामीण रुग्णालयात नेले. डॉक्टरांनी तिथे त्यांना मृत घोषित केले.
