अतिक्रमित बांधकामावर हातोडा पडणार का? केडगावकरांचा सवाल
अहमदनगर | नगर सह्याद्री
सर्वसामान्यांच्या अतिक्रमणातील बांधकामांवर महापालिका प्रशासन तसेच सार्वजनिक बांधकाम विभाग हातोडा टाकते परंतु धनदांडग्यांच्या अतिक्रमणांवर प्रशासन कारवाई करण्यास धजावत नाही. असाच काहीसा प्रकार केडगाव लिंक रोडवरील अतिक्रमणाबाबत उघडकीस आला आहे. माजी नगरसेवक, डेव्हलपर्स असलेल्या एकाचे लिंक रोडच्या कामात अडथळा निर्माण झाला आहे. त्या अतिक्रमणावर प्रशासन हातोडा टाकणार का असा सवाल केडगावकर उपस्थित करत आहेत.
पुणे महामार्गापासून कल्याण महामार्गाकडे जाण्यासाठी केडगावमधून लिंक रोड तयार करण्यात आला आहे. या रस्त्याची दुरावस्था झाली होती. परंतु, सध्या या संपूर्ण लिंक रोडचे काँक्रीटीकरणाचे काम सुरु आहे. तसेच डे्रेनेज लाईनचेही काम सुरु आहे. रस्त्यालगत असलेली अतिक्रमणे काढण्यात आली आहेत. परंतु, याच रस्त्याच्या कामात एका माजी नगरसेवकाचे कार्यालय असलेले बांधकाम अडथळा ठरत आहे.
बांधकामामुळे ड्रेनेज लाईनचे काम रखडले आहे. महापालिका व सार्वजनिकबांधकाम विभाग सर्वसामान्यांच्या अतिक्रमणांवर तातडीने कारवाई करते. परंतु, धनदांडग्यांच्या अतिक्रमीत बांधकामांवर कारवाई करण्यास धजावत नाही. सर्वसामान्यांच्या अतिक्रमणांवरच कारवाई का असा सवाल केडगावकरांकडून उपस्थित केला जात आहे. त्या नगरसेवकाच्या बांधकामाला कोणाचे अभय आहे. रस्त्याच्या कामासाठी बांधकाम पाडले जाणार का असा सवाल केडगावकरांमधून उपस्थित केला जात आहे.
