शिवसेनेच्या माजी पदाधिकार्‍याचे हॉटेल अन माजी नगरसेवकाचे कार्यालय ठरतेय अडथळा
अहमदनगर | नगर सह्याद्री:-
आगामी विधानसभा निवडणुकीच्या तोंडावर नगर शहरासह उपनगरांमध्ये मोठ्या प्रमाणात विकास कामे सुरु झाली आहेत. पुणे महामार्गापासून ते कल्याण महामार्गास जोडणार्‍या लिंक रोडचे काम सुरु आहे. परंतु, लिंकरोडच्या कामास शिवसेनेच्या माजी पदाधिकार्‍याचे हॉटेल अन माजी नगरसेवकाचे कार्यालय अडथळा ठरत आहे. येथील अतिक्रमित बांधकामावर महापालिका प्रशासन तसेच सार्वजनिक बांधकाम विभाग हातोडा टाकणार का असा रोकडा सवाल केडगावकरांकडून उपस्थित केला जात आहे.
नगर शहरात मोठ्या प्रमाणात रस्त्यांची कामे सुरु आहेत. केडगाव येथील लिंक रोडचे काम ४५ कोटींचे असून संपूर्ण रस्ता काँक्रीटकरण होणार आहे. या रस्त्याचे काम झाल्यानंतर बाहेरील वाहतूक नगर शहरात न येता बाहेरुनच जाणार आहे. लिंक रोडच्या रस्त्याचे काम सुरु असून या रस्त्याच्या कामास शिवसेनेच्या माजी पदाधिकार्‍याचे हॉटेलचे अतिक्रमण आणि माजी नगरसेवकाचे कार्यालय अडथळा ठरत आहे.
पुणे महामार्गापासून कल्याण महामार्गाकडे जाण्यासाठी केडगावमधून लिंक रोड तयार करण्यात आला आहे. या रस्त्याची दुरावस्था झाली होती. परंतु, सध्या या संपूर्ण लिंक रोडचे काँक्रीटीकरणाचे काम सुरु आहे. तसेच डे्रेनेज लाईनचेही काम सुरु आहे. रस्त्यालगत असलेली अतिक्रमणे काढण्यात आली आहेत. परंतु, याच रस्त्याच्या कामात एका बाजूला एका माजी नगरसेवकाचे कार्यालय असलेले बांधकाम अडथळा ठरत आहे.
बांधकामामुळे ड्रेनेज लाईनचे काम रखडले आहे. तर दुसर्‍या बाजूला शिवसेनेचा माजी पदाधिकार्‍याचे हॉटेलचे बांधकाम अडथळा ठरत आहे. महापालिका व सार्वजनिक बांधकाम विभाग सर्वसामान्यांच्या अतिक्रमणांवर तातडीने कारवाई करते. परंतु, धनदांडग्यांच्या अतिक्रमीत बांधकामांवर कारवाई करण्यास धजावत नाही. सर्वसामान्यांच्या अतिक्रमणांवरच कारवाई का असा सवाल केडगावकरांकडून उपस्थित केला जात आहे. त्या दोघांच्या अतिक्रमणाला कोणाचे अभय आहे. रस्त्याच्या कामासाठी दोघांचेही अतिक्रमण पाडले जाणार का असा सवाल उपस्थित केला जात आहे.
