Maharashtra Crime News: पुन्हा एकदा महिला सुरक्षिततेचा मुद्दा ऐरणीवर आला आहे. १८ वर्षींय तरुणीवर सामूहिक बलात्कार करण्यात आल्याची घटना घडली आहे. या प्रकरणी पोलिसांनी एकाला अटक केली तर दुसरा आरोपी फरार आहे. धक्कादायक घटनेमुळे परिसरात एकच खळबळ उडाली आहे.
अधिक माहिती अशी: मुंबईच्या वांद्रे परिसरात सदरची घटना घडली. १८ वर्षींय मुलीला काकांच्या घरी सोडण्याचे आश्वासन देऊन पीडित तरुणीला कारमध्ये बसवले. आरोपींनी पाण्याच्या बाटलीत गुंगीचे औषध मिसळलेले पेय पाजले. बेशुद्ध झालेल्या तरुणीवर दोघांनी सामूहिक बलात्कार केला. यासंदर्भात तक्रार केल्यास जीवे मारण्याची देखील पीडितेला धमकी देण्यात आली.
पीडित तरुणीने याप्रकरणी पोलिस ठाण्यात धाव घेत फिर्याद दिली असून दोघांविरोधात गुन्हा दाखल करण्यात आला आहे. पोलिसांनी ३१ वर्षीय व्यक्तीला अटक केली आहे. तर दुसरा आरोपी सध्या फरार आहे. अधिक तपास पोलीस करत आहेत.
