Accident News: वादळी वाऱ्यासह झालेल्या मुसळधार पावसामुळे रस्त्यावर झाड पडले होते, ज्यामुळे रिक्षाच्या चालकाचे नियंत्रण सुटले आणि रिक्षा कठड्याला धडकली. या भीषण रिक्षा अपघातात माय-लेकाचा दुर्दैवी मृत्यू झाला. तर एक महिला गंभीर जखमी झाली आहे. या घटनेने सर्वत्र हळहळ व्यक्त होत आहे.शालन पासलकर (वय.६५), दिपक पासलकर (वय.४५) असं मृत्यू झालेल्या दोघा मायलेकांची नावे आहेत.
अधिक माहिती अशी: पुण्याच्या राजगड तालुक्यातील रांजणे गावच्या हद्दीत रिक्षाचा भीषण अपघात झाला. आई शालन आणि मुलगा दीपक हे रिक्षाने कानंद येथे मुलीकडे गेले होते. संबंधित रिक्षा पाबे घाट मार्गे पुण्याच्या दिशेने जात होती. याठिकाणीही मुख्य रस्त्यावर झाडे पडलेले होते. रिक्षा तीव्र उतारावर असतानाच चालकाला पडलेले झाड दिसल्याने त्याचे वाहनावरील नियंत्रण सुटले.
यावेळी भरधाव रिक्षा थेट जवळच्या कठड्याला धडकली ज्यामध्ये दोघांचाही दुर्दैवी मृत्यू झाला. घटनेची माहिती मिळताच स्थानिक रेस्क्यू टीमने रात्रीच्या अंधारात तात्काळ घटनास्थळी धाव घेत, मदत कार्य करत पडलेले झाड कापून रस्ता वाहतुकीसाठी मोकळा केला. अपघातात मृत्यू पावलेल्या दोघांचेही मृतदेह शवविच्छेदनासाठी पाठवले आहेत. अधिक तपास पोलीस करत आहेत.
