अहिल्यानगर । नगर सहयाद्री:-
हमालवाडा, कुरेशी मस्जिद शेजारी एका पत्र्याच्या शेडमध्ये कोतवाली पोलिसांनी छापा टाकून एक लाख 40 हजार रूपये किंमतीची 10 लहान- मोठ्या जनावरांची सुटका केली. मंगळवारी (15 ऑक्टोबर) सायंकाळी साडेसातच्या सुमारास पोलिसांनी ही कारवाई केली.
या प्रकरणी पोलीस अंमलदार सुजय हिवाळे यांनी दिलेल्या फिर्यादीवरून तौसीफ कुरेशी (पूर्ण नाव नाही, रा. कुरेशी मस्जिद शेजारी, हमालवाडा, अहिल्यानगर) याच्याविरूध्द पोलीस ठाण्यात गुन्हा दाखल करण्यात आला आहे. हमालवाडा, कुरेशी मस्जिद शेजारी एका पत्र्याच्या शेडमध्ये काही गोवंशीय जनावरे कत्तलीसाठी बांधून ठेवली असल्याची माहिती कोतवाली पोलिसांना मिळाली होती.
पोलीस निरीक्षक प्रताप दराडे यांनी पंचासमक्ष सदर ठिकाणी छापा टाकण्याचे आदेश पथकाला दिले. पथकाने मंगळवारी सायंकाळी साडेसातच्या सुमारास सदर ठिकाणी छापा टाकला असता 80 हजाराची चार मोठी जनावरे, 60 हजाराची लहान जनावरे अशी एकुण 10 जनावरांची पोलिसांनी सुटका केली.
सदरची जनावरे तौसीफ कुरेशी याने कत्तलीसाठी आणली असल्याचे समोर आल्यानंतर पोलिसांनी त्याच्याविरूध्द गुन्हा दाखल केला आहे. अधिक तपास पोलीस अंमलदार एस. एस. डाके करत आहेत.
