अहमदनगर । नगर सहयाद्री
नर्सिंग कोर्ससाठी आलेल्या विद्यार्थिनीला “तू माझ्याशी व्हॉट्सअ‍ॅपवर का बोलत नाहीस, माझ्यासोबत रिलेशनशिपमध्ये का राहात नाहीस” असे म्हणत एका तरुणाने मारहाण केली आणि लॉजवर नेले. या घटनेत रोशन वाघ (रा. यवतमाळ जिल्हा) या तरुणावर गुन्हा दाखल करण्यात आला आहे.
सदर तरुणी ही यवतमाळ जिल्ह्यातील असून तिची रोशन वाघ याच्याशी चार वर्षांपासून ओळख होती. नंतर त्यांच्यात प्रेमसंबंध निर्माण झाले. तरुणी श्रीरामपूर येथे नर्सिंगचा कोर्स करण्यासाठी आली होती. कॉलेजच्या आवारात असताना रोशनने तिला मोटारसायकलवर बसण्याची मागणी केली. पेपर चालू असल्याने तिने नकार दिला, तेव्हा रोशनने बळजबरीने तिला मोटारसायकलवर बसवून शहरातील एका लॉजवर नेले.
लॉजवर रूममध्ये नेऊन “तू माझ्यासोबत रिलेशनशिपमध्ये का राहत नाहीस? तू माझ्याशी व्हॉट्सअ‍ॅपवर का बोलत नाहीस?” असे म्हणून तिला मारहाण केली आणि तिचा मोबाईल बंद केला. नंतर तिला बाभळेश्वरला नेले आणि बराच वेळ फिरवले.
दरम्यान, मुलीचा फोन बंद असल्याने तिच्या वडिलांनी स्थानिक पोलिसांना कळवले. स्थानिक पोलिसांचा फोन आल्यानंतर रोशनने सदर तरुणीला रात्री ८ वाजता पोलीस स्टेशनच्या बाहेर सोडले. तरुणीच्या तक्रारीनुसार, रोशन वाघ (रा. यवतमाळ जिल्हा) याच्याविरुद्ध गुन्हा दाखल करण्यात आला आहे.
