अहमदनगर । नगर सहयाद्री:-
शेअर मार्केट गुंतवणूकीत पावणे तीन कोटी रुपयांची फसवणूक करणाऱ्या आरोपींविरुद्ध फिर्यादींच्या तक्रारीवरुन दाखल गुन्ह्यातील आरोपींला शेवगाव पोलीस पथकाने शिताफीने सापळा लावून जेरबंद केले. छत्रपती परमेश्वर विघ्ने ( रा.आंतरवली बु. ता.शेवगाव) असे आरोपीचे नाव आहे.
फिर्यादी बबन आण्णासाहेब शिरसाठ ( रा.नविन खामपिंप्री ता.शेवगाव ) यांनी शेवगाव पोलीस ठाण्यात इनव्हेस्टमेंट नावाच्या शेअर मार्केट ट्रेडिंग कंपनीच्या नावाखाली त्यांची दोन कोटी पंच्चाहत्तर लाख रुपयांची फसवणुक झाल्याचे फिर्यादीत नमुद केल्यावरून पोलीसांनी गुन्हा दाखल केला.सदर गुन्हा दाखल झाल्यानंतर पोलीस निरीक्षक समाधान नागरे यांना वरील गुन्ह्यातील आरोपी शेवगाव शहरामधील गाडगे महाराज चौक येथे येणार असल्याची गुप्त बातमी मिळाली. पोलीस निरीक्षक समाधान नागरे याच्या पथकाने नमूद ठिकाणी सापळा लावुन आरोपीला शिताफीने ताब्यात घेतले.
वरिल आरोपी विरुध्द इतरअन्य कोणाची फसवणुक झाली असल्यास त्यांनी शेवगाव पोलीस ठाण्यात संपर्क साधावा असे आवाहन करण्यात आले आहे.सदरची कारवाईपोलीस अधिक्षक राकेश ओला, अपर पोलीस अधिक्षक प्रशांत खैरे, उपविभागिय पोलीस अधिकारी सुनिल पाटील यांचे मार्गदर्शनाखाली पो.नि. समाधान नागरे, सपोनि धरमसिंग सुंदरडे, पोसई भास्कर गावंडे, पोकॉ शाम गुंजाळ, पोकॉ संतोष वाघ, पोकॉ प्रशांत आंधळे, पोकॉ संपत खेडकर, पोकाँ राहुल खेडकर, पोकाँ बप्पासाहेब धाकतोडे तसेच नगर दक्षिण सायबर सेलचे पोकाँ राहुल गुड्डु यांनी केली आहे.
