कोपरगाव । नगर सहयाद्री:-
तालुक्यातील धारणगाव शिवारात एक धक्कादायक घटना घडली आहे.रात्री शेतात गेलेला मुलगा सकाळी घरी प्रतलाच नाही. त्याचा शोध घेण्यासाठी वडील व चुलत भावाने शेतात धाव घेतली असता तो शेतातील शेडमध्ये गळफास घेतलेल्या अवस्थेत आढळून आला. घडलेल्या प्रकरणामुळे धारणगाव परिसरात एकच खळबळ उडाली आहे.नितीन शांताराम वाणी (वय ३९ वर्षे) असे मयत इसमाचे नाव असून, तो टाकळी येथील रहिवासी आहे.
अधिक माहिती अशी की, कोपरगाव तालुक्यातील टाकळी येथील रहिवासी नितीन शांताराम वाणी हे आपल्या कुटुंबासह टाकळी येथे राहत होते. धारणगाव परिसरातील किरण शंकरराव दंडगव्हाळ यांची शेती ते वाट्याने करीत होते. त्या शेतातील शेडमध्ये नितीन वाणी यांचे पाळीव जनावरे असल्याने नितीन कधीकधी रात्री तेथे झोपण्यासाठी जात असत. ते शुक्रवारी रात्रीही तेथे झोपण्यासाठी गेले होते. शनिवारी ते सकाळी घरी न आल्याने व त्यांचा फोन न लागल्याने वडील व चुलत भावाने शेतात जाऊन पाहिले असता नितीन शेतातील शेडमध्ये गळफास घेतलेल्या अवस्थेत आढळून आले.
त्यांनी सदर घटनेची माहिती पोलीस पाटील जिजाबाई निळू रनशूर यांना दिली. त्यांनी याबाबत पोलिसांना कळवले. पो. उपनिरीक्षक महेश कुसारे, पो. कॉन्स्टेबल रमेश झडे, रशीद शेख यांनी घटनास्थळी जाऊन पंचनामा केला. मृतदेह रुग्णवाहिकेतून शवविच्छेदनासाठी कोपरगाव ग्रामीण रुग्णालयात आणण्यात आला. कोपरगाव शहर पोलीस ठाण्यात भागचंद पोपट वाणी यांच्या फिर्यादीवरून अकस्मात मृत्यूची नोंद करण्यात आली आहे.
