माजलगाव / नगर सह्याद्री : माजलगावातील राष्ट्रवादीचे आ.प्रकाश सोळंके यांनी मनोज जरांगे यांबद्द्दल केलेल्या विधानाची क्लिप व्हायरल झाल्यानंतर बीडमधील वातावरण चिघळले आहे.
सोमवारी सकाळी आंदोलकांनी आ.सोळंके यांच्या घराची जाळपोळ केली. त्यानंतर आंदोलक आणखी आक्रमक झाले. आंदोलक शहरातील मुख्य मार्गावर आले. तेथे त्यांनी दगडफेक केली.
यावेळी पोलिस अधीक्षक नंदकुमार ठाकूर व पोलिसांचा फौजफाटा शहरात पोहचला. दरम्यान, याच आंदोलकांनी आ. सोळंके यांच्या मालकीच्या शैक्षणिक संस्था आणि सहकारी संस्थांच्या इमारतींवरही दगडफेक केली. टायरही जाळण्यात आले.
तेथून आंदोलक नगर पालिकेत गेले. तेथे त्यांनी जाळपोळ करत दगडफेकही केली. सध्या शहरात तणावाचे वातावरण आहे. सोळंके यांच्या विरोधात आंदोलक घोषणाबाजी करत आहेत. एका कथित घटनेतील ऑडिओ क्लिपनंतर मराठा समाज आक्रमक झाला आहे.
