पुणे / नगर सह्याद्री : ऐन दिवाळीत सोने चांदी लुटण्याच्या घटना वाढीस लागल्या आहेत. काही घटना ताजा असतानाच आता दुकानातील सोने चांदी घेऊन घरी जाणाऱ्या सराफावर गोळीबार करत लुटण्याचा धक्कादायक प्रकार समोर आला आहे.
हा प्रकार बुधवारी रात्री साडेनऊच्या दरम्यान वानवडीतील बी.टी.कवडे रोडवर घडला. प्रदीप मदनलाल ओसवाल (वय ३५) असे हल्ला झालेल्या सराफाचे नाव आहे. त्याच्या पायाला दोन आणि तोंडाला एक गोळी लागली असून त्याच्यावर खासगी रुग्णालयात उपचार सुरू आहेत. त्यांची प्रकृती स्थिर आहे.
प्रदीप ओसवाल यांचे हडपसरमधील सय्यदनगरमध्ये सराफी दुकान असून दिवाळी असल्याने त्यांनी दुकानात मोठ्या प्रमाणावर दागिने ठेवले आहेत. ते दुकान बंद करुन दुचाकीवरुन घरी जात असताना बी. टी. कवडे रोडवर त्यांना हल्लेखोरांनी अडविले. त्यांच्यावर एका पाठोपाठ एक सहा गोळ्या झाडल्या.
त्यातील तीन गोळ्या त्यांना लागल्या. त्यांच्याजवळील दागिने असलेली बॅग चोरट्यांनी हिसकावून ते पळून गेले. गोळीबाराचा आवाज ऐकून नागरिकांनी तिकडे धाव घेतली. ओसवाल यांना जवळच्या खासगी रुग्णालयात दाखल करण्यात आले आहे.
