मुंबई। नगर सहयाद्री:-
जुलै महिना संपत आला असून, मागील 10-12 दिवसांत पावसाने महाराष्ट्राला झोडपून काढले आहे. विविध भागांमध्ये झालेल्या मुसळधार पावसामुळे मोठ्या प्रमाणात नुकसान झाले आहे. या पार्श्वभूमीवर, हवामान अभ्यासक पंजाबराव डख यांनी पुढील पाच दिवसांसाठी मराठवाड्यातील पावसाचा अंदाज व्यक्त केला आहे.
पुढील पाच दिवसांमध्ये मराठवाड्यात कोणताही अलर्ट नसून, फक्त हलक्या सरींची शक्यता आहे. छत्रपती संभाजीनगर जिल्ह्यात यलो अलर्ट जारी करण्यात आला आहे. इतर जिल्ह्यांमध्ये फक्त भूरभूर पावसाची शक्यता आहे. त्यामुळे मराठवाड्यात पुढील काही दिवसांमध्ये फारसा पाऊस होण्याची शक्यता नाही, असे पंजाबराव डख यांनी सांगितले आहे.
मागील 10-12 दिवसांमध्ये महाराष्ट्रातील विविध जिल्ह्यांमध्ये पावसाने थैमान घातले. मुंबईमध्ये पाणी साचून ‘तुंबई’ झाली, पुण्यात पूरजन्य परिस्थिती निर्माण झाली आणि गडचिरोलीमध्ये अनेक रस्ते बंद ठेवण्यात आले. नद्यांची पाणी पातळी वाढली आणि अनेक गावांत नुकसान झाले. मराठवाड्यातील विविध जिल्ह्यांमध्ये जुलै महिन्यात 55.9% पाऊस झाला आहे.
बीड जिल्ह्यात सर्वाधिक 66.8% पाऊस झाला आहे. छत्रपती संभाजीनगरमध्ये 59.2%, जालना 57.4%, लातूर 61.2%, धाराशिव 65.5%, नांदेड 49.2%, परभणी 48.7% आणि हिंगोली 47% इतका पाऊस झाला आहे. जायकवाडी धरणाचा पाणीसाठा मात्र केवळ 6.26% आहे, जो मागील चार-पाच दिवसांतील पावसामुळे 2% ने वाढला आहे.
