अहमदनगर | नगर सह्याद्री:-
नगर तालुक्यातील बाबुर्डी बेंद येथे गणेश विसर्जन मिरवणुकीत दोन गणेश मंडळांच्या कार्यकर्त्यांमध्ये डी जे मागे पुढे घेण्यावरून झालेल्या वादानंतर एका मंडळाच्या जमावाने दुसर्‍या मंडळातील वाद घालणार्‍या तरुणाला हॉटेल मध्ये लपवून ठेवल्याच्या संशयावरून हॉटेल व्यावसायिकावर तलवार कोयत्याने वार करत त्याला जीवे मारण्याचा प्रयत्न केल्याची घटना घडली. याप्रकरणी परस्परविरोधी गुन्हे दाखल करण्यात आले आहेत. खुनाच्या प्रयत्नाच्या गुन्ह्यातील आरोपी खासगी हॉस्पिटमध्ये उपचार घेत असतांना पोलिसांना गुंगारा देऊन पळून गेल्याची घटना उघडकीस आली आहे.
नगर तालुक्यातील बाबुर्डी बेंद येथे गणेश विसर्जन मिरवणुकीत दोन मंडळांच्या कार्यकर्त्यांमध्ये डी जे मागे पुढे घेण्यावरून वाद झाले. एका मंडळाच्या जमावाने हॉटेल व्यावसायिक मनोज उर्फ दत्तात्रय बाजीराव चोभे (वय ३८, रा. बाबुर्डी बेंद, ता.नगर) याच्यावर तलवार, कोणत्याने हल्ला केला. यात चोभे गंभीर जखमी झाला. याप्रकरणी चोभे यांच्या जबाबावरुन दिपक साळवे, राम साळवे, लखन साळवे, साहेबराव कोंडाजी साळवे, शिवाजी गबाजी साळवे, शिवराज अशोक इंगळे, किरण कांबळे, प्रविण कांबळे यांच्यासह ७ ते ८ अनोळखी व्यक्तींवर गुन्हा दाखल करण्यात आला आहे. त्यातील तीघांना पोलिसांनी अटकही केली आहे.
दुसर्‍या गटाकडून महिलेने दाखल केलेल्या फिर्यादीनुसार मनोज चोभेसह तिघांवर जातीवाचक शिवीगाळ व महिलांना धक्काबुक्की केल्याप्रकरणी गुन्हा दाखल करण्यात आला आहे.सदर खुनाच्या गुन्ह्यातील आरोपी दिपक साळवे हा खासगी हॉस्पिटलमध्ये उपचार घेत होता. तो गुन्ह्यातील आरोपी असल्याचे स्पष्ट झाले होते. पोलिस व दोन होमगार्ड यांना गुंगारा देऊन आरोपीने शनिवारी सकाळी पलायन केले आहे. याप्रकारामुळे नगर तालुका पोलिसांच्या कार्यपद्धतीवर प्रश्नचिन्ह उपस्थित झाले आहे.
